Na resaka fanitsiana ny rojom-pamatsiana, na fiarovana ny tontolo iainana sy ny zavamananaina, na ny fanajana lalàna mihamitombo, na koa fanirian’ny taranaka tanora vaovao – samy mitaky amin’ny orinasa rehetra ny hanova lalina ny fomba fijeriny sy ny andraikiny.
Manolo-tena ho amin’ny fitomboana maharitra sy mirindra ho an’ny rehetra : mihetsika dieny izao ho an’izao tontolo izao tsaratsara kokoa.
Eto anivon’izao tontolo izao izay mitaky fanavaozana sy fahaiza-mifanaraka tsy an-kijanona izao, dia asehonay mazava tsara ny fahavononanay hampiditra tanteraka ao anatin’ny paikadinay ny fomba fiasa maharitra sy tompon’andraikitra, izay mikendry ny fitomboana ara-toekarena miaraka amin’ny fanajana ny tontolo iainana sy ny fiaraha-monina.
Inoinay tanteraka fa ireo modely ara-toekarena afaka mijoro maharitra dia ireo izay mahay mamaly ny olana lehibe maneran-tany — toy ny fiadiana amin’ny fiovan’ny toetrandro, ny fanamafisana ny fampidirana ara-tsosialy, ary ny fanajana sy fandinihana ny fiovan’ny zavatra andrasan’ny fiarahamonina.
Ho tanteraka izany amin’ny alalan’ny toe-tsaina mifototra amin’ny
andraikitra, fanavaozana, ary mangarahara.
Fiovana ankehitriny
Ao anatin’izany , dia mandray fepetra mavitrika izahay :
- Amin’ny lafiny tontolo iainana, manohana ireo tetikasa mifantoka amin’ny fampihenana ny entona karbonina izahay, amin’ny fitantanana tompon’andraikitra ireo harena voajanahary, ary amin’ny fampiroboroboana ny fanao maharitra eo amin’ireo sehatra ara-toekarena eo an-toerana hatrany amin’ny sehatra iraisam-pirenena.
- Amin’ny lafiny ara-tsosialy, manamafy ny fiantraikanay izahay amin’ny alalan’ny fanohanana ny fidirana ara-bola sy ara-toekarena ho an’ny rehetra, ny fitovian’ny vintana, ary ny fanomezan-danja ny vehivavy sy ireo lohahevitra ara-tsosialy sy toekarena. Miezaka izahay manoloana ny filàna manokana an’ireo vondrom-piarahamonina marefo indrindra. Ataonay fototra iorenan’ny fahombiazanay maharitra ny fampandrosoana ny maha-olona.
- Amin’ny lafiny fitantanana, apetrakay ho lohalaharana ny etika, ny fanarahana lalàna, ny mangarahara, ary ny fihainoana ireo mpandray anjara, na amin’ny sehatra anatiny na ivelany.
Ireo famantarana ireo dia manosika anay hanao ny faharetana ho andry stratejika sy hery manosika ny fahombiazana.
Amin’ny alalan’ny fomba fiasa mifanaraka amin’ireo fanao tsara indrindra maneran-tany, dia manangana soatoavina iombonana izahay, mitondra heviny sy lanja ho an’ireo mpanjifanay, mpiara-miasa, mpiara-miombon’antoka ary ireo mpandray anjara rehetra.
Amin’ny fanandratana ny fomba fiasa maharitra ho ivon’ny modelinay, dia mikendry ny ho mpisava làlana amin’ny fananganana toekarena malagasy miraika kokoa, maharitra kokoa ary tompon’andraikitra kokoa i BNI MADAGASCAR.
Ny olona no ivon’ny ezaka rehetra ataonay.
Mino izahay fa afaka miroborobo miaraka ny olona tsirairay, ny fiaraha-monina ary ny natiora. Mifamatotra tanteraka izy telo ireo, ary samy ilaina raha te hahatratra harena maharitra sy lovain-jafy.
Amin’ny fametrahana ny maha-olona ho fototry ny firosoanay amin’ny maha-tompon’andraikitra, dia mikatsaka fitomboana manokana sy iarahan’ny rehetra izahay — amin’ny fikorianan’ny fiovana avy amin’ny olona mankany amin’ny fiaraha-monina sy ny tontolo iainana, ary avy amin’ny tontolo manodidina hiverina amin’ny fiaraha-monina sy ny tsirairay.
Ny fahasalamana sy fahasambarana ara-tsaina, ara-batana ary ara-tsosialy an’ny olona iray dia mitondra fiantraikany tsara amin’ny manodidina azy.
Ary rehefa mahazo tohana ara-tsosialy, ara-toekarena ary ara-tontolo iainana izy, dia vao mainka mahavita zava-tsoa kokoa.
Io fomba fanao mitambatra io no manamarika ny fanirianay : hanorina ho avy rariny kokoa, mirindra kokoa, ary maharitra kokoa ho an’ny rehetra.
Ireo andraikitra sahaninay :
Amin’ny maha banky mpiara-miombon’antoka voalohany amin’ny sehatra tsy miankina eto Madagasikara anay, ary amin’ny maha mpitarika amin’ny tambajotra ara-bola manerana ny nosy, dia manolo-tena izahay ho an’ny ho avin’ny taranaka mifandimby.
Kendrenay ny mandray anjara mavitrika amin’ny fanovàna mankany amin’ny fomba fandrosoana maharitra sy mifanaraka amin’ny filàn’ny tontolo ankehitriny sy ho avy.
Amin’ny alalan’ny marika KRED, dia afaka manitatra ny fidiranay hatrany amin’ny faritra tena lavitra indrindra izahay, ka ahafahan’ny olona an-tapitrisany miditra amin’ireo toerana sy tolotra ara-bola fototra sy ilaina amin’ny fiainana andavanandro.
Lafiny maha-olona sy fiaraha-monina :
Mifantoka amin’ny sehatra roa tena fototra izahay : ny fahasalamana sy ny fanabeazana.
Amin’ny alalan’ny tetikasa Salama BNI, izay iarahana amin’ny Fondation AXIAN, dia efa nanohana mihoatra ny 300 000 olona izahay amin'ny alalan'ny fanatsarana fotodrafitrasa ara-pahasalamana 20, 80% ny vehivavy no nahazo tombony mivantana tamin’ireo fanatsarana ireo.
Tamin’ny taona 2022, ny asa sy ny fandraisana andraikitry ny BNI MADAGASCAR dia nahatonga ny famoronana asa 135 000 manerana an’i Madagasikara : 1000 mahery no asa mivantana, 2000 asa tsy mivantana,
4 400 asa hafa mifandray,ary mihoatra ny 125 000 asa vokatr’ireo , manohana ireo sehatra maro samihafa.
Satria mino izahay fa harena ny fahasamihafana,
dia manolo-tena hanandratra kolontsaina miorina amin’ny fahasamihafana, fitoviana ary fandraisana anjara ho an’ny rehetra.
Amin’ny alalan’ireo programa mifantoka amin’ny fahasalamana ara-batana sy ara-tsaina, ary ny fahasalamana ara-piainana amin’ny ankapobeny, dia mikendry izahay ny hanome tontolo iasana mitovy zo sy manome fahafahana mitovy ho an’ny tsirairay.
Nanomboka tamin’ny taona 2022, dia maro ireo fotodrafitrasa ara-pampianarana any amin’ny faritra lavitra indrindra eto Madagasikara no nohavaozina, mba hahafahan’ireo ankizy miditra amin’ny fanabeazana amin’ny fomba tsara kokoa sy akaiky kokoa.
Natao koa ny fanamafisana sy fanatsarana ny fitaovana enti-mampianatra, na amin’ny sekoly fanjakana na amin’ny sekoly tsy miankina, ka nahafahana nanatsara ny fepetra ianarana sy ny tontolon’ny fianarana.
Amin’ny mangarahara tanteraka, dia mitentina eo amin’ny 117 000 taonina amin’ny karbôna mitovy lanja ny entona avoakanay.
93 % amin’izany no avy amin’ireo hetsika mifandraika amin’ny famatsiam-bola ataonay sy ny sehatra tohananay amin’ny alalan’ny asan’ny banky.
Misafidy izahay ny hanavao sy hanatsara hatrany ny fomba fiasa amin’ireo vokatra sy tolotra mifanaraka amin’ny fandrosoana maharitra.
Amin’ny lafiny iray, dia ampiharina amin’ny asanay ny fomba fitantanana mitandrina amin’ny voka-dratsin’ny asa amin’ny tontolo iainana sy ny fiaraha-monina, ka amporisihinay ny sampana sy mpiara-miombon’antoka rehetra mba handray anjara amin’ny fampihenana ny loza mety hitranga mifandray amin’ny famatsiam-bola.
Amin’ny lafiny iray koa anefa, manavao vahaolana ara-bola maharitra izahay, ho valin’ireo fanamby lehibe atrehin’izao tontolo izao ankehitriny, toy ny fahantrana, ny fiovaovan’ny toetrandro, na ny tsy fitoviana ara-tsosialy.
Eo amin’ny sehatra ara-barotra, dia manamafy ny paikady izahay mba hanampy amin’ny fiovàna tsikelikely ho amin’ny fomba fanao manaja kokoa ny tontolo iainana sy mahasoa ny fiaraha-monina ireo tetikasa sy famatsiam-bola ataonay.
Mampihatra programa vaovao izahay miaraka amin’ireo mpiara-miombon’antoka aminay, ho fanohanana ny fiovàna angovo sy tontolo iainana, amin’ny alalan’ny tetikasa BNI Lovainjafy, ary koa amin’ny alalan’ny famatsiam-bola natokana ho an’ny fandrosoan’ny vehivavy mpandraharaha sy ny fahaleovantenany ara-toekarena.
Ho anay, io fomba fiasa io dia iray amin’ireo herin’ny fitomboana tena fototra.
Ny ezaka ataonay amin’ny famerenana amin’ny laoniny ny ala :
Amin’ny maha mpiara-mihetsika matotra anay amin’ny fikajiana sy fanarenana ny ala an-tanety sy an-dranomasina, dia nandray anjara izahay tamin’ny fanarenana ny faritra arovana Maromizaha, amin’ny velaran-tany 62 hektara.
- Fanarenana ala honko ao amin’ny faritra Boeny, izay tena manan-danja amin’ny fiarovana ny tontolo sy ny fiveloman’ny mponina any an-toerana.
- Fanatanterahana fambolena hazo amin’ny faritra avo manodidina an’Antananarivo, ho fanamafisana ny harena voajanahary sy ny fiarovana ny renivohitra amin’ny loza voajanahary.
